Ubwo Senegal yatangiraga ibikorwa byo gukingira abaturage bayo icyorezo cya COVID-19, Perezida w’iki gihugu , Macky Sall na we ari mu bakingiwe.
Perezida Macky Sall yakingiwe ku wa 25 Gashyantare. Iki gikorwa kikaba cyaranyuze kuri televiziyo zitandukanye zo muri iki gihugu.
Kuva mu minsi ibiri Senegal itangiye ibikorwa byo gukingira abaturage bayo, imaze gukingira abagera ku 4000. Inkingo iki gihugu kiri gukoresha ni izigera kuri doze ibihumbi 200 cyaguze mu Bushinwa.
BBC yatangaje ko Perezida Macky Sall yavuze ko bahisemo kuba baguze izi nkingo kuko batari gutegereza igihe bazagerezwaho izo bazahabwa muri guhunda y’Ishami ry’Umuryango w’Abibumbye rishinzwe ubuzima, OMS yo gusaranganya inkingo izwi nka COVAX.
Uretse izi doze z’inkingo ibihumbi 200, Senegal yatangaje ko mu minsi iri imbere iteganya kwakira izindi doze miliyoni esheshatu zizayifasha gukingira umubare munini w’abaturage bayo.
Source: BBC
